Kalaallit Nunaanni Naatsorsueqqissaartarfik
Kalaallit Nunaanni Naatsorsueqqissaartarfik Kalaallit Nunaanni pisortatigoortumik naatsorsueqqissaarnernut qitiusumik oqartussaasuuvoq.
Naatsorsueqqissaartarfiup pingaarnertigut akisussaaffigineqarnera siulersuisunit isumagineqarpoq, taakkulu inuiaqatigiinni pissutsinik ilisimasaqartunik tallimanik ilaasortaqarput. Ulluinnarni aqutsisoqarneq naatsorsueqqissaartarfimmi pisortaasumit isumagineqarpoq, taassumalu suliffeqarfik avammut nittarsaattarpaa.
Aaqqissuussaanikkut inissisimaneq
Naatsorsueqqissaartarfik aaqqissuussaanikkut Aningaasaqarnermut Naalakkersuisoqarfiup ataaniippoq. Aningaasaqarnermut naalakkersuisoqarfiup Naatsorsueqqissaartarfimmi aningaasaqarneq sulisunullu atugassarititat pingaarnertut akisussaaffigivai. Atugassarititat naatsorsueqqissaarnermut tunngasut siulersuisut akisussaaffigivaat.
Siulersuisut suliassaat
Siulersuisut suliassaat Inatsisartut inatsisaanni nr. 11, 29. oktober 1999-imeersumi takuneqarsinnaasut ukuupput:
· Kalaallit Nunaanni Naatsorsueqqissaartarfimmut pingaarnertut akisussaaffik isumagissallugu
· Kisitsisitigut paasissutissat tamaneersut katiternissaannut siunnersuuteqassallutik
· Kalaallit Nunaanni Naatsorsueqqissaartarfik anguniakkanut aalajangersakkat naapertorlugit sulinersoq nakkutigissallugu
· Suliniuteqarfigineqartunut piffissaq ungasinnerusoq isigalugu Kalaallit Nunaanni Naatsorsueqqissaartarfiup pilersaarusiornera akuerissallugu
· Kalaallit Nunaanni Naatsorsueqqissaartarfiup sulinissamut pilersaarutai akuerissallugit
· Ukiumut ataasiartumik suliffeqarfiup sulinera pillugu Naalakkersuisunut nalunaarummik tunniussaqartarnissaq
Siulersuisut katitigaanerat
Siulersuisut 2017-ip naanerani ukuninnga inuttaqarput, taakku atuuffiisa atorunnaarnissaat ungaluusami nalunaarutigineqarpoq:
· Vøgg Løwe Nielsen, siusinnerusukkut Danmarks Statistikkimi allaffimmi pisortaasimasoq (juunip tallimaanni 2020)
· Tønnes Berthelsen, KNAPK-mi pisortap tullia (juunip tallimaanni 2019)
· Kim Neumann Nielsen, Akileraartarnermut Aqutsisoqarfimmi pisortaq (juunip tallimaanni 2019)
· Lulu Nielsen, Kommuneqarfik Sermersuumi siunnersortaaneq (juunip tallimaanni 2020)
· MîtdlâraK E. Lennert, Aningaasaqarnermut Naalakkersuisoqarfik (juunip tallimaanni 2018)
Kalaallit Nunaanni Naatsorsueqqissaartarfiup sulisui sinnerlugit Bolatta Vahl siulersuisuni 2017-imi ilaasortaatinneqarpoq. Bolatta Vahl 2018-imiit Josef Kâjangmammit taarserneqassaaq.
Kalaallit Nunaanni Naatsorsueqqissaartarfimmut siulersuisut 2017-imi pingasoriarlutik ataatsimiipput. Siullermik ataatsimiinnermi 2016-imi angusat, matumuunalu ukiumoortumik nalunaarusiap suliarineqarnera akuerineqarneralu, sammineqarput. Aappassaanik ataatsimiinnermi Kalaallit Naatsorsueqqissaartarfiup tunngaviusumik inatsisaata allanngortinneqarnissaanut tunngasut pingaarnertut sammineqarput pingajussaanillu ataatsimiinnermi 2017-imi missingersuutit suliassanullu pilersaarutit sammineqarlutik.